ಮಹಾನ್ ಮಾತೆಯರು

[ಕನ್ನಡದ ಕವಿಯೊಬ್ಬರು ಹೇಳಿರುವಂತೆ “ಮನೆಯೆ ಮೊದಲ ಪಾಠಶಾಲೆ, ಜನನಿ ತಾನೇ ಮೊದಲ ಗುರುವು, ಜನನಿಯಿಂದ ಪಾಠ ಕಲಿತ ಜನರು ಧನ್ಯರು.” ಪ್ರತಿಯೊಬ್ಬ ವ್ಯಕ್ತಿ ತಾಯಿಂದ ಜನ್ಮವನ್ನು ಮಾತ್ರ ಪಡೆಯುವುದಲ್ಲದೆ, ಬದುಕಿನ ಬಹಳಷ್ಟನ್ನು ಪಡೆಯುತ್ತಾರೆ. ತಮ್ಮ ಮಕ್ಕಳನ್ನು ಲೋಕವೇ ತಿರಸ್ಕರಿಸಿದಾಗಲೂ, ಅವರೊಂದಿಗೆ ನಿಂತು, ಅವರನ್ನು ಮುನ್ನಡೆಸಿದ ತಾಯಂದಿರ ಬಗ್ಗೆ ಈ ಅಂಕಣ] 

ವಿಲ್ಮಾ ರುಡಾಲ್ಫ್ ಅಮೇರಿಕಾದ ಓಟಗಾರ್ತಿ. ೧೯೬೦ರಲ್ಲಿ ಅವರು “ವಿಶ್ವದ ಅತ್ಯಂತ ವೇಗವಾದ ಮಹಿಳೆ” ಎಂದು ಬಿರುದು ಪಡೆದರು. ಕಪ್ಪು ಸಮುದಾಯಕ್ಕೆ ಸೇರಿದ ಅವರು ನಾಗರಿಕ ಹಕ್ಕುಗಳು ಮತ್ತು ಮಹಿಳಾ ಹಕ್ಕುಗಳಿಗಾಗಿ ಹೋರಾಟ ನಡೆಸಿದರು. 

೧೯೪೦ ರ ಜೂನ್ ೨೩ ರಂದು ಅಮೇರಿಕಾದ ಟೆನಿಸ್ಸೆ ರಾಜ್ಯದ ಬೆತ್ಲೆಹೇಮ್ ನಲ್ಲಿ ಜನಿಸಿದ ವಿಲ್ಮಾ ಹುಟ್ಟಿದಾಗ ಬಹಳ ಬಲಹೀನವಾಗಿದ್ದರು. ಅವರಿಗೆ ಹಲವಾರು ಖಾಯಿಲೆಗಳಿತ್ತು, ಪೋಲಿಯೊ, ಸ್ಕಾರ್ಲೆಟ್ ಜ್ವರ ಮತ್ತು ನ್ಯುಮೋನಿಯಾ. ಇದರಿಂದಾಗಿ ಅವರ ಕಾಲು ಸೊಟ್ಟವಾಗಿ ಅರೆಅಂಗವಿಕಲರಾದರು. ಅವರ ಕಾಲುಗಳಿಗೆ ನಡೆಯಲು ಲೋಹದ ಪಟ್ಟಿಗಳನ್ನು ಹಾಕಲಾಯಿತು. ಮನೆಯವರೆಲ್ಲ ಔಷಧಿ ಹಚ್ಚಿ, ಕಾಲನ್ನು ನೀವುತ್ತಿದ್ದರು, ಫಿಸಿಯೋಥೆರಪಿ ಕೊಡಲಾಯಿತು. ಆದರೆ ಡಾಕ್ಟರ್, “ಅವಳು ಮತ್ತೆಂದೂ ನಡೆಯಲು ಸಾಧ್ಯವಿಲ್ಲ” ಎಂದು ಹೇಳಿದರು. ಆದರೆ ಆಕೆಯ ತಾಯಿ, ವೈದ್ಯರೊಂದಿಗೆ ಸೆಡ್ಡು ಹೊಡೆದುಬಂದರು. “ಇಲ್ಲ ನನ್ನ ಮಗಳು ಖಂಡಿತವಾಗಿ ನಡೇಯುತ್ತಾಳೆ.” ತಾಯಿ ವಿಲ್ಮಾಳೊಂದಿಗೆ ಸಹ ಅದನ್ನೇ ಹೇಳಿದರು. “ನೀನು ನಡೆಯಬಲ್ಲೆ. ಅದನ್ನು ನೀನು ಗಾಢವಾಗಿ ನಂಬಬೇಕು.” ವಿಲ್ಮಾ ಹೇಳುತ್ತಾರೆ. “ನಾನು ನನ್ನ ತಾಯಿಯ ಮಾತನ್ನು ಬಲವಾಗಿ ನಂಬಿದೆ. ೯ನೇ ವರ್ಷದವಳಿದ್ದಾಗ ನನ್ನ ಕಾಲಿನ ಪಟ್ಟಿಯನ್ನು ತೆಗೆದುಹಾಕಿದೆ. ೨ ವರ್ಷಗಳ ನಂತರ ನಾನು ಬಾಸ್ಕೆಟ್ ಬಾಲ್ ಆಡಲಾರಂಭಿಸಿದ್ದೆ.” ಉತ್ತಮ ಓಟಗಾರ್ತಿಯಾಗಿದ್ದ ಅವರಿಗೆ ಕೋಚ್ ತರಬೇತಿ ನೀಡಿದರು. ೧೬ನೇ ವಯಸ್ಸಿನಲ್ಲಿ ಅಮೇರಿಕಾದ ಒಲಿಂಪಿಕ್ ತಂಡದಲ್ಲಿ ಸ್ಥಾನಗಳಿಸಿದ ಅವರು ಆಸ್ಟ್ರೇಲಿಯಾದಲ್ಲಿ ನಡೆದ ಒಲಿಂಪಿಕ್ ರಿಲೇ ಓಟದಲ್ಲಿ ಕಂಚಿನ ಪದಕ ಪಡೆದರು. ತಮ್ಮ ಸತತ ಪ್ರಯತ್ನಗಳೊಂದಿಗೆ ೧೯೬೦ರಲ್ಲಿ ಒಲಿಂಪಿಕ್ಸ್ ನಲ್ಲಿ ೧೦೦ ಮೀಟರ್, ೨೦೦ ಮೀಟರ್ ಹಾಗೂ ೪*೧೦೦ ಮೀಟರ್ ರಿಲೆಯಲ್ಲಿ ಚಿನ್ನದ ಪದಕಗಳನ್ನು ಗಳಿಸಿದ ಮೊದಲ ಅಮೇರಿಕನ್ ಮಹಿಳೆಯಾದರು.